Área de Allariz

Dous pesos pesados lideran este xeodestino: as localidades de Ourense e Allariz, cada unha cunha morea de monumentos que reclaman a atención. A capital da provincia é ben coñecida tanto pola súa vinculación co río Miño, como co mundo romano. O Miño está cruzado na capital por varias pontes e un moderno paseo permite percorrer a beira. Son moi representativas da capital termal de Galicia, de Ourense, as coñecidas Burgas, un espazo rehabilitado xa nos límites da zona vella, no que manda sen dúbida a Catedral. O templo, tardorrománico, foi erguido a partir do século XII, declarado basílica en 1837 e Monumento Nacional no ano 1931. Non hai que esquecer a visita ao Museo Arqueolóxico. Allariz tivo a sorte de conservar practicamente intacto o seu núcleo principal, granítico tanto nas rúas como nos edificios. A súa exemplar rehabilitación mereceu o premio Europa Nostra e hoxe a vila é un modelo do turismo sustentable galego. Os seus museos conforman unha pequena rede que, xunto coa potenciación de negocios hostaleiros “con encanto” e o agarimo co que se trataron as beiras do río, atraen milleiros de visitantes. Xa saíndo do casco histórico fai falta subliñar a ponte románica de Vilanova. Entre os monumentos destas terras podemos destacar en Baños de Molgas a capela prerrománica de Santa Eufemia de Ambía e o santuario dos Milagres no monte Medo. Dentro da arquitectura popular podemos descubrir o conxunto de hórreos da Merca e o conxunto de casas fidalgas en Sobrado do Bispo (Barbadás). A cidade de Ourense está intrinsecamente ligada coa auga. A do río Miño que atravesa a cidade discorre baixo as súas seis pontes. O Viaduto, a Ponte Nova, a Pasarela do Vao, a Ponte Romana, a Ponte do Milenio e a Ponte do Ribeiriño constitúen en si mesmos un recurso turístico pola singularidade da súa disposición e pola evolución arquitectónica que reflicten e que se pode gozar percorrendo o paseo fluvial por calquera das súas dúas beiras. Tamén a auga, esta vez quente, converteuse no signo máis identificativo da capital da provincia. A Ourense chámaselle tamén a cidade das Burgas, polos seus mananciais de augas hipertermais, silicatadas, fluoradas e litínicas, que teñen importantes propiedades dermatolóxicas e cuxo nome crese que procede do latín burca, que quere dicir pía, en alusión aos baños romanos. Existen tres Burgas, a de Arriba, a do Medio e a de Abaixo, de estilos popular, moderno e neoclásico respectivamente e que son o punto de partida dun complexo termal, ao aire libre e ás beiras do río Miño.