Reserva da Biosfera Ribeira Sacra e Serras do Oribio e Courel

A Reserva de Biosfera forma parte da conca media do Rio Miño, na zona de confluencia deste co seu principal afluente, o Sil, articulándose en tres grandes unidades: unha zona montañosa periférica, entre as que destacan as Montañas do Oribio e do Courel, unha gran superficie de topografía chaira, formada polo recheo dunha conca sedimentaria de orixe Cenozoico, e os canóns fluviais do Miño e Sil.

Nas zonas de montaña consérvanse ademais importantes superficies configuradas por mosaicos de hábitats naturais – seminaturais, representados por queirogais secos europeos, distintos tipos de bosques caducifolios e perennifolios, humidais, medios rochosos, etc. A área alberga unha elevada diversidade de hábitats de interese comunitario.

Ao tratarse dunha área de transición de dúas rexións bioxeografías de características diferentes (a Rexión Atlántica e a Rexión Mediterránea) o territorio alberga unha elevada riqueza de especies silvestres, tanto no relativo á flora como á fauna. Moitas destas especies foron catalogadas como en perigo de extinción ou vulnerables talles como o oso pardo, o gato montés, o Galemys pyrenaicus e diferentes especies de morcegos. Tamén destaca pola súa extraordinaria diversidade florística, onde conflúen elementos atlánticos, eurosiberianos e mediterráneos. Subliñar a presenza de Arabis juressi, Silene acutifolia, Veronica micrantha, Eryngium duriaei juresianum, Schistotega pennata, Narcissus asturiensis, N. cyclamineus, N. Triandrus e Orchis provincialis.