A carpa promocional da Rede de Parques Naturais de Galicia recala na Coruña por ser un dos referentes do turismo de cruceiro en Galicia. Así o manifestou a conselleira de Medio Ambiente e Ordenación do Territorio, Beatriz Mato, tras a súa visita ao punto de información situado no recinto portuario, onde aproveitou a ocasión para convidar a turistas e veciños a descubrir os “tesouros” da Galicia natural.
A instalación da carpa promocional na Coruña responde, dixo Beatriz Mato, “a nosa aposta pola divulgación e posta en valor do patrimonio natural de Galicia nunha cidade que destaca por ser unha porta aberta cara ao Atlántico e porto de acollida de milleiros de turistas que chegan a bordo dos transatlánticos”.
Neste senso, a representante do Goberno galego sinalou que os seis parques naturais cos que conta a Comunidade recibiron, no que levamos de ano, un total 184.188 visitas, o que supón un incremento do 33 por cento con respecto ao mesmo período do ano pasado. “Polo tanto, deducimos -afirmou a conselleira- que a boa tendencia manteranse ao longo deste ano”.
Igualmente, a titular de Medio Ambiente destacou a importancia de desenvolver a actividade turística mediante un planificación coherente e ordenada, que garanta a preservación dos espazos especialmente sensibles e a conservación da súa autenticidade e valores patrimoniais, tanto desde o punto de vista natural como desde o punto de vista cultural.
Así, “co novo Plan de promoción e posta en valor do patrimonio natural de Galicia e, en concreto, con accións coas que hoxe desenvolvemos na Coruña, queremos lograr o obxectivo -asegurou Beatriz Mato- de converter os parques naturais en espazos máis coñecidos e atractivos para os galegos e e para os turistas, pero sempre desde un punto de vista sustentable”.
Unha vintena de actuacións previstas
Cómpre salientar que o Plan de promoción e posta en valor do patrimonio natural, que puxo en marcha a Consellería de Medio Ambiente, conta con 29 accións específicas cuxo obxectivo é aproveitar as sinerxías creadas entre as iconas naturais de Galicia e ofrecer un servizo máis eficaz aos miles de visitantes e galegos que deciden coñecer a algún destes espazos.
Deste modo, ademais da participación en feiras especializadas no sector turístico e a elaboración de paquetes para cada un dos parques, púxose en marcha o pasaporte natural, un documento tamén coñecido como a ‘Compostela’ dos parques galegos, que se pode adquirir nos centros de recepción de visitantes de cada parque e tamén na carpa instalada no porto da Coruña coa que se convida ao titular a completar o percorrido por todos estes enclaves. Así, quen o desexe poderá deixar constancia, mediante un selo, do seu paso por todos e cada destes espazos.